0:00
/
1ܐܝܼܢܵܐ ܐَܡܝܼܪܹܗ ܐܸܠܵܝܗܝ ܐܘܼܦ ܐܵܗܵܐ ܡܵܣܠܵܐ: ܕܒܟܠ ܥܕܵܢܵܐ ܘܵܓ̰ܸܒ ܝ݇ܠܵܗ̇ ܕܨܵܠܝܼ ܨܠܘܿܬܵܐ ܘܠܵܐ ܣܵܩܕܝܼ: ܒܹܐܡܵܪܵܐ. 2ܚܲܕَ ܕܲܝܵܢܵܐ ܐܝܼܬ ܗ݇ܘܵܐ ܓܵܘ ܚܕܵܐ ܡܕܝܼܢَܬܵܐ: ܘܡ̣ܢ ܐܲܠܵܗܵܐ ܠܹܐ ܙܵܕܸܥ ܗ݇ܘܵܐ: ܘܡ̣ܢ ܒܢܲܝ̈ܢܵܫܵܐ ܠܹܐ ܢܵܚܸܦ ܗ݇ܘܵܐ. 3ܘܚܕܵܐ ܐܲܪܡܸܠܬܵܐ ܐܝܼܬ ܗ݇ܘܵܐ ܒܗ̇ܝ ܡܕܝܼܢَܬܵܐ: ܘܐܵܬܝܵܐ ܗ݇ܘܵܐ ܠܟܸܣܠܹܗ: ܘܐܵܡܪܵܐ: ܥܒ̣ܘܿܕ ܠܵܗ̇ ܕܝܼܘܵܢܝܼ ܡ̣ܢ ܡܘܼܕܲܥܝܝܼ. 4ܘܠܹܐ ܒܵܣܡܵܐ ܗ݇ܘܵܐ ܠܹܗ ܚܲܕَ ܙܲܒ̣ܢܵܐ: ܐܝܼܢܵܐ ܒܵܬَܪ ܗܵܕܵܐ ܐَܡܝܼܪܹܗ ܒܓܵܢܹܗ: ܐܸܢ ܡ̣ܢ ܐܲܠܵܗܵܐ ܠܹܐ ܝܘܸܢ ܒܸܙܕܵܥܝܵܐ: ܘܡ̣ܢ ܒܢܲܝ̈ܢܵܫܵܐ ܠܹܐ ܝܘܸܢ ܒܸܢܚܵܦܵܐ. 5ܐܝܼܢܵܐ ܣܵܒܵܒ ܕܡܲܓ̰ܗَܘܝܝܼ ܝ݇ܠܵܗ̇ ܐܵܗܵܐ ܐܲܪܡܸܠܬܵܐ: ܒܸܬ ܥܵܒ̣ܕܸܢܵܗ̇ ܕܝܼܘܵܢܘܼܗ̇: ܕܒܟܠ ܥܕܵܢܵܐ ܠܵܐ ܗܵܘܝܵܐ ܒܹܐܬܵܝܵܐ ܥܲܓ̰ܘܙܝܼ. 6ܘܐَܡܝܼܪܹܗ ܡܵܪܲܢ: ܫܡܸܥܡܘܿܢ ܡܘܼܕܝܼ ܐَܡܝܼܪܹܗ ܕܲܝܵܢܵܐ ܢܵܐܗܲܩ. 7ܘܐܲܠܵܗܵܐ ܠܹܐ ܥܵܒܸܕ ܠܵܗ̇ ܕܝܼܘܵܢ ܕܓܘܼܒ̇ܝܘܼ̈ܗܝ ܕܩܵܪܝܼ ܠܹܗ ܒܐܝܼܡܵܡܵܐ ܘܒܠܲܝܠܹܐ: ܘܡܲܪܝܸܟ ܒܹܢܹܗ ܥܲܠܵܝܗܝ. 8ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܒܸܬ ܥܵܒܸܕ ܠܵܗ̇ ܕܝܼܘܵܢܵܝܗܝ ܓ̰ܲܠܕܹܐ. ܐܝܼܢܵܐ ܟܲܕ ܐܵܬܹܐ ܒܪܘܿܢܹܗ ܕܐ݇ܢܵܫܵܐ: ܒܸܬ ܡܵܫَܟ̰ܸܚ ܗܲܝܡܵܢܘܼܬܵܐ ܥܲܠ ܐܲܪܥܵܐ: 9ܘܐَܡܝܼܪܹܗ ܐܵܗܵܐ ܡܵܣܵܠܵܐ ܕܲܪܩܘܼܒ̣ܠ ܕܐܵܢܝܼ ܕܒܗܹܒ̣ܝܼ ܗ݇ܘܵܘ ܒܓܵܢܵܝܗܝ ܕܙܲܕܝܼܩܹ̈ܐ ܗ݇ܘܵܘ: ܘܡܲܣܠܝܼ ܗ݇ܘܵܘ ܠܐ݇ܚܹܪ̈݇ܢܹܐ. 10ܬܪܹܝ ܐ݇ܢܵܫܹ̈ܐ ܐܣܸܩܠܗܘܿܢ ܠܗܲܝܟܠܵܐ ܠܨܵܠܘܿܝܹܐ: ܚܲܕَ ܦܪܝܼܫܵܐ: ܗ̇ܘ ܐ݇ܚܹܪ݇ܢܵܐ ܕܲܡܓ̣ܵܟ̰ܝܼ. 11ܦܪܝܼܫܵܐ ܟܸܠܝܵܐ ܗ݇ܘܵܐ ܒܹܝܠܹܗ ܠܓܵܢܹܗ: ܘܐܲܢܹܐ ܨܵܠܘܿܝܹܐ ܗ݇ܘܵܐ: ܐܲܠܵܗܵܐ: ܫܵܟܘܿܪܹܐ ܝܘܸܢ ܐܸܠܘܼܟܼ ܕܠܹܐ ܝܘܸܢ ܐܲܝܟܼ ܐ݇ܢܵܫܹ̈ܐ ܐ݇ܚܹܪ̈݇ܢܹܐ: ܚܵܛܘܿܦܹ̈ܐ: ܢܵܐܗܲܩܹ̈ܐ: ܩܲܗܒܹ̈ܐ: ܝܲܢ ܐܲܝܟܼ ܐܵܗܵܐ ܕܲܡܓ̣ܵܟ̰ܝܼ. 12ܟܹܐ ܨܵܝܡܸܢ ܬܲܪ̈ܬܹܝ ܓܵܗܹ̈ܐ ܒܫܲܒܬܵܐ: ܟܹܐ ܝܵܗَܒܸܢ ܡܲܥܣܵܪܹ̈ܐ ܕܟܠ ܡܸܢܕܝܼ ܕܩܵܢܸܢ. 13ܐܝܼܢܵܐ ܕܲܡܓ̣ܵܟ̰ܝܼ ܟܸܠܝܵܐ ܡ̣ܢ ܪܸܚܩܵܐ: ܠܹܐ ܒܵܥܝܹܐ ܗ݇ܘܵܐ ܐܘܼܦ ܠܵܐ ܥܲܝܢܘܼ̈ܗܝ ܡܵܪܸܡ ܠܫܡܲܝܵܐ: ܐܸܠܵܐ ܡܵܚܹܐ ܗ݇ܘܵܐ ܥܲܠ ܨܲܕܪܹܗ ܘܐܵܡܸܪ: ܐܲܠܵܗܵܐ: ܥܒ̣ܘܿܕ ܪܲܚܡܹܐ ܐܸܠܝܼ ܚܲܛܵܝܵܐ. 14ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܨܠܹܐܠܹܗ ܐܵܗܵܐ ܡܘܼܟܫܸܛܵܐ ܠܒܲܝܬܹܗ: ܙܵܘܕܵܐ ܡ̣ܢ ܕܗ̇ܘ ܐ݇ܚܹܪ݇ܢܵܐ: ܣܵܒܵܒ ܟܠ ܐ݇ܢܵܫܵܐ ܕܡܵܪܸܡ ܓܵܢܹܗ ܒܸܬ ܦܵܐܹܫ ܡܘܼܟܸܦܵܐ: ܘܟܠ ܡ̇ܢ ܕܡܲܟܸܦ ܓܵܢܹܗ ܒܸܬ ܦܵܐܹܫ ܡܘܼܪܡܵܐ. 15ܐܝܼܢܵܐ ܡܘܼܬَܝܹܠܗܘܿܢ ܠܟܸܣܠܹܗ ܐܘܼܦ ܝܲܠܘܼܕܹ̈ܐ ܕܕܵܩܸܪ ܗ݇ܘܵܐ ܒܝܼܵܝܗܝ: ܘܚܸܙܝܵܝܠܗܘܿܢ ܬܲܠܡܝܼܕܘܼ̈ܗܝ ܘܢܓ̰ܸܘܠܗܘܿܢ ܒܝܼܵܝܗܝ. 16ܐܝܼܢܵܐ ܝܼܫܘܿܥ ܩܸܪܝܵܝܠܹܗ ܠܟܸܣܠܹܗ: ܘܐَܡܝܼܪܹܗ ܐܸܠܵܝܗܝ: ܫܒ̣ܘܿܩܘܿܢ ܝܵܠܹܕَܐ ܙܥܘܿܪܹ̈ܐ ܐܵܬܝܼ ܠܟܸܣܠܝܼ: ܘܠܵܐ ܡܲܟܠܝܼܬܘܿܢ ܠܗ݇ܘܿܢ: ܣܵܒܵܒ ܕܐܵܢܝܼ ܕܐܲܝܟܼ ܕܐܲܢܹܐ ܝ݇ܠܵܗ̇ ܡܲܠܟܘܼܬܵܐ ܕܫܡܲܝܵܐ. 17ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܡ̇ܢ ܕܠܵܐ ܩܵܒܸ̇ܠ ܡܲܠܟܘܼܬܐ ܕܐܲܠܵܗܵܐ ܐܲܝܟܼ ܝܵܠܵܕَܐ ܙܥܘܿܪܵܐ: ܠܹܐ ܥܵܒܼܸܪ ܓܵܘܵܗ̇. 18ܘܒܘܼܩܸܪܹܗ ܚܲܕَ ܡ̣ܢ ܪܹ̈ܫܵܢܹܐ: ܘܐَܡܝܼܪܹܗ: ܐܸܠܹܗ: ܡܲܠܦܵܢܵܐ ܛܵܒ̣ܵܐ: ܡܘܼܕܝܼ ܥܵܒ̣ܕܸܢ ܕܝܵܪܬܸܢ ܚܲܝܹ̈ܐ ܕܠܐܵܒܲܕ. 19ܐܵܡܸܪ ܐܸܠܹܗ ܝܼܫܘܿܥ: ܩܵܡܘܿܕܝܼ ܒܸܩܪܵܝܝܼ ܝܘܸܬ ܛܵܒ̣ܵܐ: ܠܲܝܬ ܛܵܒ̣ܵܐ ܫܒ̣ܘܿܩ ܡ̣ܢ ܚܲܕَ: ܐܲܠܵܗܵܐ. 20ܦܘܼܩܕܵܢܹ̈ܐ ܟܹܐ ܝܵܕܥܸܬ: ܠܵܐ ܩܵܛܠܸܬ: ܘܠܵܐ ܥܵܒ̣ܕܸܬ ܩܲܗܒܘܼܬܵܐ: ܘܠܵܐ ܓܵܢܒܸܬ: ܘܠܵܐ ܝܵܗَܒܸܬ ܣܵܗܕܘܼܬܵܐ ܕܕܘܼܓܠܵܐ: ܥܒ̣ܘܿܕ ܐܝܼܩܵܪܵܐ ܠܒܵܒܘܼܟ ܘܠܝܸܡܘܼܟ. 21ܘܐَܡܝܼܪܹܗ ܐܸܠܹܗ: ܐܲܢܹܐ ܟܠܵܝܗܝ ܢܛܝܼܪܵܝܗܝ ܝܘܸܢ ܡ̣ܢ ܝܵܠܕ݇ܘܼܬܝܼ. 22ܐܝܼܢܵܐ ܟܲܕ ܫܡܸܥܠܹܗ ܝܼܫܘܿܥ ܐܲܢܹܐ: ܐَܡܝܼܪܹܗ ܐܸܠܹܗ: ܒܚܲܕَ ܡܸܢܕܝܼ ܒܵܨܘܿܪܵܐ ܝܘܸܬ: ܙܵܒܸ̇ܢ ܟܠ ܡܸܢܕܝܼ ܕܐܝܼܬ ܠܘܼܟܼ: ܘܗܲܒَܠ ܠܡܸܣܟܹܢܹ̈ܐ: ܘܒܸܬ ܗܵܘܝܵܐ ܠܘܼܟܼ ܚܲܙܝܼܢܵܐ ܒܫܡܲܝܵܐ ܘܬܵܐ: ܐܵܬܸܬ ܒܵܬَܪܝܼ. 23ܐܝܼܢܵܐ ܗ̇ܘ ܟܲܕ ܫܡܸܥܠܹܗ ܐܲܢܹܐ: ܦܫܸܡܠܹܗ ܪܵܒܵܐ: ܣܵܒܵܒ ܕܪܵܒܵܐ ܕܵܘܠܲܬܡܲܢܕ ܝܼܗ݇ܘܵܐ. 24ܘܟܲܕ ܚܙܹܐܠܹܗ ܝܼܫܘܿܥ: ܐَܡܝܼܪܹܗ: ܟܡܵܐ ܥܲܣܩܵܐ ܝ݇ܠܵܗ̇ ܠܐܵܢܝܼ ܕܐܝܼܬ ܠܗ݇ܘܿܢ ܡܵܐܠ ܕܥܵܒܼܪܝܼ ܠܡܲܠܟܘܼܬܹܗ ܕܐܲܠܵܗܵܐ. 25ܒܘܼܫ ܗܵܣܵܢܵܝܝܼ ܝ݇ܠܵܗ̇ ܠܓܘܼܡܠܵܐ ܕܥܵܒܼܪܵܐ ܒܢܸܩܒܵܐ ܕܚܡܵܛܵܐ: ܡ̣ܢ ܕܕܵܘܠܲܬܡܲܢܕ ܥܵܒܸܪ ܠܡܲܠܟܘܼܬܹܗ ܕܐܲܠܵܗܵܐ. 26ܐܵܡܪܝܼ ܐܸܠܹܗ ܐܵܢܝܼ ܕܫܡܸܥܠܗَܘܿܢ: ܒܲܣ ܡܵܢܝܼ ܡܵܨܹܐ ܠܸܚܵܝܵܐ. 27ܐܝܼܢܵܐ ܐَܡܝܼܪܹܗ: ܐܵܢܝܼ ܕܠܟܸܣ ܒܢܲܝ̈ܢܵܫܵܐ ܠܹܐ ܡܵܨܝܼ ܠܸܗܘܵܝܵܐ: ܠܟܸܣ ܐܲܠܵܗܵܐ ܟܹܐ ܡܵܨܝܼ. 28ܐܵܡܸܪ ܐܸܠܹܗ ܟܹܐܦܵܐ: ܗܵܐ: ܐܲܚܢܲܢ ܫܒܸܩܠܲܢ ܟܠ ܡܸܢܕܝܼ ܘܐَܬܹܐܠܲܢ ܒܵܬَܪܘܼܟ. 29ܐܵܡܸܪ ܐܸܠܹܗ: ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܠܲܝܬ ܐ݇ܢܵܫܵܐ ܕܫܵܒܸܩ ܒܵܬܹ̈ܐ: ܝܲܢ ܐܲܒ̣ܵܗܹ̈ܐ: ܝܲܢ ܐܵܚܘܿܢܘܵܬܹ̈ܐ: ܝܲܢ ܒܲܟ̣ܬܵܐ: ܝܲܢ ܒܢܘܿܢܹ̈ܐ: ܒܚܵܬܸܪ ܕܡܲܠܟܘܼܬܵܐ ܕܐܲܠܵܗܵܐ. 30ܘܠܵܐ ܩܵܒܸ̇ܠ ܚܲܕَ ܒܪܵܒܵܐ ܒܐܵܗܵܐ ܙܲܒ̣ܢܵܐ: ܘܒܥܵܠܡܵܐ ܕܐܵܬܹܐ ܚܲܝܹ̈ܐ ܕܠܐܵܒܲܕ. 31ܘܠܘܼܒܸܠܹܗ ܠܬܪܸܥܣܲܪܬܹܗ: ܘܐَܡܝܼܪܹܗ ܐܸܠܵܝܗܝ: ܗܵܐ: ܒܹܐܣܵܩܵܐ ܝܘܵܚ ܠܐܘܿܪܸܫܠܸܡ: ܘܒܸܬ ܦܵܝܫܝܼ ܬܘܼܡܸܡܹܐ ܟܠܵܝܗܝ ܕܝܼܢܵܐ ܟܬܝܼܒܹܐ ܒܢܒ̣̈ܝܹܐ ܒܘܼܬ ܕܒܪܘܿܢܹܗ ܕܐ݇ܢܵܫܵܐ. 32ܣܵܒܵܒ ܕܒܸܬ ܦܵܐܹܫ ܣܘܼܦܝܵܐ ܠܛܵܝܸܦܹ̈ܐ: ܘܒܸܬ ܡܲܣܚܸܪܝܼ ܒܝܹܗ: ܘܒܸܬ ܥܵܒ̣ܕܝܼ ܠܹܗ ܒܹܨܘܼܪ: ܘܒܸܬ ܪܵܝܩܝܼ ܓܵܘ ܦܵܬܹܗ. 33ܘܒܸܬ ܓ̰ܲܢܓ̰ܸܪܝܼ ܠܹܗ: ܘܒܸܬ ܩܵܛܠܝܼ ܠܹܗ: ܘܒܝܵܘܡܵܐ ܕܬܠܵܬَܐ ܒܸܬ ܩܵܝܸܡ. 34ܘܐܵܢܝܼ ܚܕܵܐ ܡ̣ܢ ܕܐܲܢܹܐ ܠܵܐ ܦܘܼܪܡܹܠܗܘܿܢ: ܘܡܘܼܟܸܣܬܵܐ ܗ݇ܘܵܐ ܡܸܢܵܝܗܝ ܐܵܗܵܐ ܗܹܡܸܙܡܵܢ: ܘܠܵܐ ܝܕܸܥܠܗܘܿܢ ܐܲܢܹܐ ܕܝܼܗ݇ܘܵܘ ܗܘܼܡܙܸܡܹܐ. 35ܘܗَܘܹܐ ܠܵܗ̇ ܟܲܕ ܩܘܼܪܒܸܢܹܗ ܠܐܝܼܪܝܼܚܘܿ: ܚܲܕَ ܣܸܡܝܵܐ ܝܬܝܼܒ̣ܵܐ ܗ݇ܘܵܐ ܥܲܠ ܡܲܪܙܵܐ ܕܐܘܼܪܚܵܐ ܒܸܓܒ̣ܵܝܵܐ. 36ܘܫܡܸܥܠܹܗ ܟܸܢܫܵܐ ܒܸܥܒ̣ܵܪܵܐ: ܘܒܘܼܩܸܪܹܗ: ܡܘܼܕܝܼ ܝܠܹܗ ܐܵܗܵܐ. 37ܐܵܡܪܝܼ ܐܸܠܹܗ: ܝܼܫܘܿܥ ܢܵܨܪܵܝܵܐ ܒܸܥܒ̣ܵܪܵܐ ܝܠܹܗ. 38ܘܡܘܼܩܘܸܚܠܹܗ ܘܐَܡܝܼܪܹܗ: ܝܼܫܘܿܥ: ܒܪܘܿܢܹܗ ܕܕܵܘܝܼܕ: ܪܵܚܸܡ ܥܲܠܝܼ. 39ܘܐܵܢܝܼ ܕܒܹܐܙܵܠܵܐ ܗ݇ܘܵܘ ܩܵܕَܡܘܼܗܝ ܢܓ̰ܸܘܠܗܘܿܢ ܒܝܹܗ ܕܫܵܬܸܩ: ܐܝܼܢܵܐ ܗ̇ܘ ܒܘܼܫ ܙܵܘܕܵܐ ܡܲܩܘܸܚ ܗ݇ܘܵܐ: ܒܪܘܿܢܹܗ ܕܕܵܘܝܼܕ: ܪܵܚܸܡ ܥܲܠܝܼ. 40ܘܟܠܹܐܠܹܗ ܝܼܫܘܿܥ: ܘܦܩܸܕܠܹܗ ܕܡܲܝܬَܝܝܼ ܠܹܗ ܠܟܸܣܠܹܗ ܘܟܲܕ ܩܘܼܪܒܸܢܹܗ: ܒܘܼܩܸܪܹܗ. 41 ܘܐَܡܝܼܪܹܗ ܐܸܠܹܗ: ܡܘܼܕܝܼ ܒܵܥܹܝܬ ܥܵܒ̣ܕܸܢ ܐܸܠܘܼܟܼ: ܘܗ̇ܘ ܐَܡܝܼܪܹܗ: ܡܵܪܝܼ: ܕܚܵܙܸܢ. 42ܘܝܼܫܘܿܥ ܐَܡܝܼܪܹܗ ܐܸܠܹܗ: ܚܙܝܼ: ܗܲܝܡܵܢܘܼܬܘܼܟ ܩܲܡ ܡܲܚܝܼܵܐ ܠܘܼܟܼ. 43ܘܗܲܪ ܒܗ̇ܝ ܣܵܥܲܬ ܚܙܹܐܠܹܗ: ܘܐܵܬܹܐ ܗ݇ܘܵܐ ܒܵܬَܪܹܗ: ܫܵܒܘܿܚܹܐ ܠܐܲܠܵܗܵܐ. ܘܟܠܹܗ ܛܵܝܸܦܵܐ ܟܲܕ ܚܙܹܐܠܹܗ: ܝܘܼܗَܒܼܸܠܹܗ ܚܸܩܪܵܐ ܠܐܲܠܵܗܵܐ.